上回：早一日剛收工就收到agency電話，叫我落舖做Promoter，我講到明係乜都唔識，佢即刻安排training第二朝俾我。
1. Training確實係一對一，由office我估佢係做retail and marketing的哥仔講佢哋各種打機的産品。我對呢個哥仔印象好好，因為佢記得晒所有part time個名。佢問我有無打機，我話無，手機遊戲呢？都無。佢俾左叠notes我，我從手袋拎支筆出黎寫嘢，佢有少少驚訝。
2. train咗1粒鐘左右，佢阿姐就敲門入嚟，問佢搞掂未，指住我話佢要12點落到舖，旺角無隨意門落尖沙咀咖。睇住哥仔俾阿姐小，問佢啲嘢即係未做晒啦？哥仔攬住部機、文件，阿姐行去邊佢就急步跟去邊，好似日劇辦公室畫面，好有喜感但我笑唔出，惟有擰轉背廢事佢尷尬。其實我心裡諗，如果我再返工返落去，我應該都同阿姐脾性差不多，我連副眼鏡都同佢一樣。
3. 因為第一次返，哥仔要陪埋我落去。搭車時我都嘗試低調地撩下佢傾計，佢低頭係咁用電話處理公事。我少少故意放慢腳步行，心諗佢咁樣會死咖。然後轉念一想，頂，真係一日唔偷雞就做保長，當年由一區撲去另一區開會，咪又係好似喺地鐵水上飄咁。
4. 阿哥仔話，問我係咪fresh grad（yeah!) ，有無諗過將來想點，做咩工，我忍唔住用返平時勁mean 嘅mode同佢講我就其實不嬲好知自己做咩嘅。可能我都有少少自動讓人開放心扉的能力，我都無向佢套近乎，佢就講俾我知，畢業出來去咗杭州工作幾年，返來香港幫家人生意，做得悶，又鐘意打機，做呢份工，又發現其實同打機無關。
5. 到了舖頭，店長俾左個名叫Junice 嘅Junior Sales 嘅名牌我，我叫咩名根本係唔重要。做Promoter，其實其他sales都當你透明，對於佢地嚟講，我同之前再之前再之前嚟過的人係無分別，哪怕你第一日返工，都會講，點解你唔知啲嘢放邊，尋日咪同你講過囉。
6. 呢世人從來未做過舖頭，不過對人對得多，面皮不嬲厚，只係要慣講hello welcome, thank you byebye。因為我係透明嘅，我唔講無人小我，但我聽到隔離有2個女仔問個男仔，你病好返咖啦喎，點解淨係聽到我地2個把聲。
7. 我負責俾客試玩VR機。總之我嘅工作同嘉年華攤位排隊玩遊戲係一樣的。無乜難搞客，products亦唔難記。只係覺得好笑，讀書時勁鍾意研究視覺文化，畢生致力避開所有simulation的感官刺激，連睇電視都藐。依家居然sell VR機！
8. 我知自己衰，我真係知。食lunch時個心諗，平時我喺尖沙咀食個飯，好可能已經係今日成日人工。最後我去左食$38蚊冷烏冬，又好食又似返我平時的生活。
9. 阿姐到了5、6點落嚟舖頭，親自放啲新game promotion在舖頭，順便睇下我做成點。其實本身都唔覺得特別辛苦，臨走有個lolita同男友過來，想「體驗童話世界」，完全唔聽指示，其他sales見人地lolita，勁殷勤過晒黎睇佢玩，吹脹。佢走左嗰下，真係身心俱疲，先發現腳企到好攰。
10. 收工，舖頭經理叫我聽日返嚟着返promoter衫，我頂咗句話，應該無聽日。心態上的沮喪大於生理上，好想即刻跑入廁所換衫，着返我件靚仔牛仔褸做返自己，蕩下蕩下蕩咗入誠品，但個人都睇唔到書，坐底覆返agency msg。我都未收工佢已經問我幾時再得閒返。拎個schedules睇先發現忘記咗睇社運電影節，講印度性工作者的片，更加自暴自棄。我知我知我知自己不嬲奢侈開，文化生活係奢侈品。
11. 所以話知青文青都係無撚用，做一日都咁攰，難為人地做一年做一世。我會繼續深觀呢種狀態。
12. 阿媽話，都好嘅，你成世人都唔知個錢可貴。講到好似我係富二代咁。的確，我應該係屋企裡最無捱過的人，搭車返屋企，我終於明點解老豆以前放工返來，總係會隊罐啤酒靜靜睇電視。
表tag:
