上回講的是適應這個世界，這次講講要再調適自己。做所謂slash（註）其實一啲都唔浪漫。
五、自律是寶貴的能力
因為自由身的關係，你想做好多又得，你想不做又得，都看自己的安排。
一月尾，剛去完長旅行，經歷了一段不務正業的時間，又過農曆新年，那段時間專心關注自己，執吓屋約吓朋友，然後發現預了要約的訪問者，不能臨時臨急今日約明日，就後悔自己不去早早規劃。好喇，到意識到無乜錢駛，有工作狂病歷的我，開始又係咁搵臨時工，人地肯請，不理三七廿一就做，那個將很多事攬上身的傾向又出返來，漸漸發現自己一周無一日休息，但錢又唔見賺多左。
自律、平衡，由細靠學校打鐘安排的。依家無王管，如同搖搖板沒了一邊重量，點樣對自己好，點樣搵到食，人人都有其方法，我就提自己，不如試吓定時定候。做賣衫sales時最好，因為介紹我一齊做嗰個老友日日提我飲水痾屎同埋食晏。以前做全職，有時真係屎都唔得閒痾咖。
六、好生活是不用錢的
不再每個月定時出糧，收入不一定穩定，有時工作完了都唔知幾時收到數，所以要學會量入為出，或量出為入都得，例如我部電腦壞了，生財工具都無埋，雖然買的只是$3000樓下的chromebook，但即刻感受到其逼切性要去搵多幾日散工做吓。
臨時工兼職工，人工係好Q低。暫時最高薪的是珠寶展helper，兩文三語，又去到山卡啦咁遠，先得$60蚊時薪，一定係被agency食咗個客俾你人工的起碼一半先俾返你。
惟有同自己講，好的生活不太需要用錢，以前返工無時間運動，依家會踩單車去不遠的地方，以前好少在家吃飯，煮親飯都幾舊水開支wine咁，依家發現其實十蚊都買到餸煮2餐飯，有時間多去行山吸下新鮮空氣，出街食飯會睇住價錢但其實食得一樣飽，生活規律咗，肥咗又靚咗。不過當然，如果你好需要物質享受，那就去搵錢吧。
七、只要你享受當下，每件事都有其樂趣
大學畢業後頭幾年都轉工轉得比較密，以至依家見工都會被問個人係唔係好唔定（而我上一份工做了5年囉唔該）。但我覺得這幾個月吊吊揈做散工，我因而學會的事似乎也不少。所謂低技術工作，其實你也不一定搞得掂，讀得多書唔係大X晒，「百無一用是書生」才是真的。玩票性質的於飯堂幫手，重複淥麵、洗碗、砌菜，純勞動身體，腦袋放空，重複性動作做得多，確係會越做越找到秘訣。不要看輕看似容易的事，每個職業都是專業。
每份工作都要適應，也不要說那些工作特別容易，你就可以一步登天。真係你識講乜乜七七主義，唔代表你洗到二百隻碗。
八、你都不為自己着想，就沒有人為你着想
久唔久就有人話，你依家唔駛做就爽啦。把打散工說成風流、自主。我比較想問，點解個社會令人為理想、為生活自主，就必須附帶着生活不穩，無法長遠規劃的風險先。畢竟把工作切碎聘人、外判、自僱，本來就是新自由主義發展下一種方便人力資源調配的勞工剝削。爽歸爽，自己揀還自己揀，不要忘記是剝削來的，只係你暫時不能大叫一句剝削就吸風飲露咁解。
在未能從根本解決處境之前，要發展一套保護自己的模式。做遊戲推廣員之初，game公司briefing介紹遊戲機類型同有咩game，唔打機嘅我係拎本moleskine同墨水筆出來寫筆記的。依家諗返都覺得自己戇＿！一開始，還是以返長工的心態去做，後來有個19歲、自稱佢老母同我差不多年紀的小弟弟教我：
做散工要頹，工作越頹，麻煩就越少。
拋開一向植入骨髓的工作倫理。agency遲出糧、扣工資之類固然要小9，試過落街做問卷調查的拍擋當自己是監工，我也是黑面以對。返工遲到咪遲到囉，唔駛趕到影響腎上腺素咖喎。簡單來講，就是要做返自己，為個幾十蚊一粒鐘，唔駛太好禮貌，亦不能太唔怕蝕底。份工無咗咪再搵過囉，大把工啦。
幾有彈性，有幾多好處，乜都好，剝削就是剝削。長工的工作倫理，在散工係唔work咖。無論如何，請好好保護自己。
註：
slash，又稱「斜號人」或「斜號青年」，意指青年身兼多職的新生活模式。
表tag:
裏tag:
