前言：立法會選舉塵埃落定，議員各就各位，又有多少人會留意到，立法會議員在議事堂雄辯滔滔，背後需靠助理如何努力發功？政治、社運工作並不只為兩餐，可是生活又總得要過，那麼應該如何思考自己與團體的關係？有由建制轉到社區團體的助理，指薪金福利於他而言不重要，即使待遇大跌也是值得，但亦有工作十多年的組織者認為，與團體終究是僱傭關係，而且工作也不一定與社運理想吻合。這個訪問系列，既要紀錄鎂光燈邊緣的功臣，亦希望為各位打算投身政治工作的年輕人提供參考。
平日我們看到議員在議會上力陳政策的種種弊病，有時還即興引用一些詩詞和歷史，不禁佩服他們的見識︰一個人怎麼可能對每一個議題都料如指掌呢？
這自然是因為議員有一班助理在背後頻頻發功，做了大量研究、調查以至行政工作。然而，議會新聞再多，議員風頭再出，我們都從來看不到議員助理的身影。這次，惟工新聞訪問了曾在工黨做了議助4年的陳倩瑩（Daisy）。Daisy在2012年開始擔任議員助理，做了一屆會期。她不僅跟我們分享自己的工作，更由一個議助的角度，去看立法會運作，以及議會和社會運動的關係。
議助工作︰排山倒海，仲要一開始……完全唔識做！
「基本上，議員係全天候開會，議助喺背後發功。」Daisy很簡單地概括了議員和議助的工作。「好似我老闆咁，每星期開立法會嘅大會、內會同財會。佢又係一啲panel嘅主席，要開sub-com，仲要見官員、民間團體、市民、社工同心理學家等專業組織。議助嘅工作就係準備議員開會前後嘅嘢。喺立法會開會前，準備同睇文件、聯絡其他人來公聽會發言。有時仲要入紙開會、聯絡相關團體、定agenda，take minues。其他時候就跟進議題，向各部門問data、發新聞稿、製定發言稿、寫議案意見書同報告、回覆市民求助信等等。有啲會都要跟議員出去開，議員唔得閒嘅話仲要代議員去。」Daisy一項一項地列舉議助的工作，聽起上來，工作真是排山倒海，好像永遠做不完。
如此大的工作量自然不是Daisy獨力應付。她所屬的議員辦公室有十個議助，八個全職，兩個半職，人手算是很多。她說議助人數是議員自己訂的。每位立法會議員都會收到一份lump sum，可按各自需要分配，有些議員不把資源花在助理身上，只請三四個人。
一班議助會互相分配議題，例如Daisy跟進長期照顧的社區服務，有同事便跟進安老院，另外也有輔導、精神健康等，過程大家商議決定。「議助的工作範疇其實無規定，主要睇議員同議助嘅互動，好多時都係睇議員想做咩議題，有咩方向想做，然後議助又有咩興趣，大家再一齊com。」
一班議助之中，並非每人都認識要跟進的政策，或者以前有相關經驗。Daisy起初便純粹因為巧合才當中議員助理。「我原本完全唔知道議助係做咩。但因為我大學修Politics，同立法會有關嘅工作我有興趣，想知道議會係點運作。同埋我又對啲大政策有興趣，所以就搵左呢份工。」
因此很多議助都是邊做邊學，Daisy也不例外。她笑說︰「起初真係乜都唔識！我本身唔熟書，每次同議員開會，唔識嘅terms都會抄低晒，返去逐個逐個查字典囉！開頭一年都係學習為主，我本身個底比較闊，社會初有共識同未有共識嘅野都會掂下。要過左一年之後先慢慢適應到，可以代議員去開會，睇下團體有乜行動配合。要適應立法會工作唔易，我跟嘅議員本身已經係連任，知道議會點運作，如果議員又係新，四年工作要用兩至三年先可以進入到。」
突發大事打亂日常節奏 須靠議員助理補飛
Daisy做議助的四年間，見證了社會環境變化。自佔領運動後，社會愈來愈政治化，很多針對政府的爭議性事件都鬧得滿城風雨，高鐵超支、東北規劃、私人安老院問題、網絡廿三條，一浪接一浪，議員一時間處理不了，議助的支援便更關鍵。
「2014至16年間社會發生好多大事，東邊爆便要撲東邊，西邊爆便撲西邊，好辛苦。」她說。「老實講，議員跟進唔晒，就要靠我地放低手頭工作一齊『隊』。版權條例時，我地要不斷開會、同民間團體相討、睇文件個案、寫發言稿，真係好痛苦。新界東北又係，要不斷寫問題俾議員『片』政府，議員本來都唔識咖嘛……我地都唔識，就要臨急去學。」幸好陳的辦公室人手較多，即使工作量大增還勉強可以應付得來，但其他議助便要長期超時工作。
議助的日常工作亂作一團，Daisy的心情便很複雜︰「無計咖，但而家你要集體拉倒佢（政府），唯有放低手頭上嘅工作。議員係要回應民意，唔可以自己做自己嘢，否則同屍位素餐無分別。但當咁多嘢爆出來時，有啲嘢就會相對押後，例如市民嘅求助個案。佢地都會有好多怨言，你叫我點同佢解釋？唔通話唔得閒做？無可能咖……我覺得呢啲代價係社會要一齊承擔。」
政府亂出錢扮解決問題 長期累積才能應付關鍵時刻
在處理社會重大事件的同時，Daisy卻始終不願放棄議助承擔的長期工作，因為這幾年間，她目睹政府的政策制定藥石亂投，可謂愈幫愈忙。她舉了一個例子︰早前長者輪候院舍問題成為關注點，政府便拋錢出來搞照顧券，向外招聘更多人手做看護，但細節卻很有問題。
Daisy解釋道：「一開頭，招聘嘅社工工作期限得三年，社工覺得工作唔穩定，搞到請唔到人。於是政府就去請外勞，搵啲廣西姐姐嚟照顧老人家，結果溝通唔到，要每日換人。後來，發展到有啲患失智症的老人家唔認得看護，但看護又要幫佢地洗澡，就打起上嚟……所以，只係拋錢出來，反而令長者照顧嘅問題惡化……」
對她來說，長期工作累積了政策問題和處理方法的認識，在關鍵時候可以成為與政府拉鋸的資源。又或者反過來說，長期工作累積的基礎，是為了避免浪費機會︰「政策改變好難只靠一嘢就成功，要長期累積再等critical point先撻得著。最怕嘅係，到咗critical point，你無貨，政府求其掉個方案出來，你死硬啦。政府最叻咁做，一有咩唔掂就拋舊錢出黎，一次性增加人手，但所有問題都無改變到。如果我地本身無累積，見到政府攞錢出來真係會啞咗，唔通你話政府做咗嘢咩？」
社運與議會相互配合 魔鬼細節靠議會把關
經歷了幾年的議助工作，Daisy可說是掌握了立法會的運作，對於議會的功用和限制，她自有一番見解。與坊間的論述一樣，Daisy也覺得議會的效用有限︰「我同意一啲大政策，例如政改、性傾向歧視立法，因為都係講票數，議會確實失效。我好難話我地成功爭取到標準工時，因為呢啲事係講政治同輿論壓力，係社會運動要做嘅事。」
然而在她眼中，議會在制定政策上起到的把關作用，是從事社會運動的人不能忽略的。她說︰「假如所有政策都用社會行動來做嘅話，其實唔得。就算係醫委會同版權條例呢啲大爭議性嘅議題，除咗靠動員，都要睇當中嘅條文。你唔熟書，搵唔到門路去迫政府改，淨係同佢鬥大聲，佢唔X理你。因為佢覺得理據喺自己度，佢攞數據出嚟，證明真係幫到人。所以我地就要拆佢啲數據點樣幫唔到人。佢俾你嚇一嚇，都要返去諗諗。」
議員和議助對很多問題都不是一開始就料如指掌。Daisy說熟書的議員可以提供研究和調查的方向，令議助的工作更有效率。但之後對議題的了解，還是需要其他團體的配合和共同行動。「好像之前香港嘅綜合家居照顧服務，政府定期會重新投標。香港自2000年加入世貿後，社會服務便要行投標制，令服務唔可以常規化，對有需要嘅人士造成好多麻煩。我地於是搞咗聯署行動、拉社工抗議，寫意見書，結果阻止咗投標。呢啲過程唔止係鬥大聲，仲係鬥有無料。」她舉例說。
議會有其既存的限制，但正正因為這些限制，我們才要思考一同推動社會改變的人之間有甚麼連結的可能。「其實大家搞咁多社運、自決，無非都係想市民生活過得好啲。做議助嘅人都係希望市民嘅生活可以更好。所以先要更著重政策上嘅魔鬼細節，我成日覺得，假如呢啲魔鬼細節處理唔到，就算有普選都好難搞。社會上唔同人有唔同角色，市民唔會睇政策文件，傳媒搵吸晴同大單嘅報導，立法會嘅部分我覺得係要做把關工作。」
後記
Daisy所屬的議員今年沒有參選，她也因此沒有再做議助，轉到外國讀書。「經過呢幾年，民生同政制上嘅嘢都算係明白咗，所以想知道更加廣闊既嘢，例如全球、國際事務點樣影響香港，想知得全面啲。」她說。我們問︰議助的工作有幫到你儲錢嗎？她說工資不過二萬，但幾年間也儲到少少錢。提起工作條件，她補了一句︰「我準時收工架！我議員係工黨，所以我地議助都夾實佢，（講笑）話你唔可以帶頭剝削工人，去勞工處告你咖！」
【議辦助理訪問系列】
Graphic Icons Designed by Freepik
表tag:
縮字:
平日我們看到議員在議會上力陳政策的種種弊病，有時還即興引用一些詩詞和歷史，不禁佩服他們的見識︰一個人
interviews:
