飛棚工傷系列四之一 　平均每年死3人 飛棚傷亡避無可避

編按：截至十一月中，本年與建造業有關的致命意外為18宗，當中一半涉及從高處墮下事故。因此，有議員提出禁止使用俗稱「飛棚」的懸空式棚架。工聯會屬下的建造業總工會等工會，隨之與承建商組成竹棚業大聯盟，遊行反對禁止飛棚。單靠數字，外行人或難以理解飛棚業的情況，工業傷亡權益會撰文解釋飛棚的危險之處，引述意外身亡工友之親屬撰文，與及工傷工友自述，惟工新聞特此轉載。

「飛棚」又叫做「吊棚」，或「懸空式棚架」。淨係聽個名又「飛」，又「吊」，又「懸空」，就知道係幾咁危險。「飛棚」主要應用喺外牆工作，例如維修冷氣、水管、防漏工程等等。即係喺建築物嘅外牆，用竹搭建一個突出黎嘅小型棚架，工人就可以上面做嘢。

之所以話「飛棚」呢個工作危險，有需要限制甚至禁止使用，係因為每年都有兩三宗因為搭建、使用或者拆卸嘅時候發生嘅意外。

有人會話意外發生係因為工人唔小心，但有時候就算工人幾小心，都冇辦法避免受傷，甚至死亡。因為有啲建築物根本就唔適合用「飛棚」，點解？

因為有啲建築好睇唔實際，無位打3粒拉爆螺絲，以安裝個狗臂架來承托個棚；有啲係因為舊樓係磚牆，打唔到爆拉螺絲，令到棚架承托力不足；有啲地方就係因為安全帶冇地方扣等等等等。

呢啲情況之下令「飛棚」嘅工作增加咗危險性。長毛喺一個電台節目裏面講過， 工人覺得我哋打爛佢哋飯碗，因為佢哋抽唔中嗰支籤。聽日我哋就睇下抽中呢支籤，導致死亡嘅工友家屬點睇飛棚。