最近的生活是諗，煮咩，寫咩，同埋雕章雕咩。呢段生活，可以稱得上是on job detox，清清過往在雲上工作積落的毒，踩踩個生存的實地。
在中環返短期工。所謂賣衫，其實係荀位來的，因為呢個位真係人流極少。大家好清楚呢個崗位只需要存在，因此可以做好多其他野。加上同老友一齊做，結果好似以前中學去自修室咁，工作桌上亂到七彩，收錢時撥開晒枱面啲雜物先開到部電腦咁樣。
日日對住啲衫，好驚自己視野只在這2百平方呎裏。好彩可以做自己嘢。在這裏過了聖誕，又過了元旦，失去了對「紅日」的知覺，又無去元旦遊行。存在就有錢收的幸福生活，所以無咩嘢寫。
食：第一日在SOHO間Burger King買咗$58個餐之後，我就發誓要帶飯。結果有7成時間都係有帶飯的。日日都帶飯，放工會諗煮咩餸好呢。雖然通常都煮啲30 mins快飯，但可以照顧自己飲食，而唔係好似以前日夜顛倒，要半夜三更先入到廚房整宵夜，心情是愉悅的。惟一問題係，我其實係唔食得微波爐叮嘢，食咗一星期，即刻生唇瘡，準得好離譜。
最近試了芝麻味噌醬煮番薯，收工去百佳買咗一個洋葱同一個番薯，共$4蚊雞，咁樣可以食2餐。尋晚見屋企浸咗冬菇，中為西用整左蕃茄冬菇燴飯，落左2塊卡夫芝士，簡直唔認得自己。日日食自己煮的飯真係好幸福。而且，老豆專登買晒餸俾我煮，幾乎唔駛花錢（掩眼）。唔帶飯的時候，吃素的最好選擇是去勝香園買蕃茄蛋麵，$28，或者在伊利近街的玉葉吃海帶綠豆沙。返中環舊區的小小確幸。咖啡的選擇是100蚊6包的Drip Coffee，又平又好味。
定時返工放工，N年無過規律生活。飲多咗水，食多啲嘢，健康生活，全靠老友Keep住提醒 ♥。凡事太盡，緣份勢必早盡。
錢：一定係因為水星逆行逆咗在我的八宮，12月中去完汕頭之後，我發現我拮据情況已經到底，連沙都刮唔到粒出來。唔好問我點解，我都唔知點解。識我的人都知本人一向係視錢財如糞土的月光族，最近literally是屎都無得食。本身計過夠駛埋月底，但原來計漏了自動轉帳交唔知乜叉保險。一向收開月薪的人，個個月好老定等台慶（aka出糧日），又加上我真係好唔識理財，咁大個女都無諗過呢啲野。然後就發現有錢在手，就會駛，無錢在手，就唔會駛。實行日日都是No spent day。
今朝，我經歷一個複雜的思考辯證過程：朝早用八達通搭了$6.2車到中環，螢幕顯示餘額$6.5。落車，想買個包做早餐，但個袋只有$5蚊，我諗緊好唔好用八達通去7仔買蛋糕，但今晚約咗人在屯門，車費成廿雞，用八達通ok，但千祈要搭一程過個架車，唔好要轉車，會無轉乘。諗起麥記有10蚊平野，下午茶就食佢，咁早啲食個飯盒囉。
成個思考過程經歷咗一條鴨巴甸街斜路。最後我決定返上舖頭食我放咗幾日都無食的雪梨做早餐，丫，又真係幾甜喎。
為幾蚊，花咁多腦汁。呢種就是基層生活？用好少錢過好的生活，確是一種學習來的。
表tag:
裏tag:
