上回話說，加咗勤工獎之後，promoter個whatsapp group變得好歡樂。本身無人出聲，淨係得agency發更表同臨時調更搵人，依家久不久有人就住不同的安排爆一爆。本身佢想用加勤工獎來吸引散工們返多返齊，點不知管理越多屎忽嘢，打工嘅就越作反。我梗係又適當地插科打諢下，唔敢太出面，但又暗地與其他人交流下消息，食下花生咁。
1. 又遲到。今日唔係返store，第一次返外派的promotion counter。去人地百貨公司收銀處簽到，幾大都寫準時啦。點知俾人哋個收銀寫返個準確時間。做咩啫，大家都打工啫，又唔係你俾錢。
2. 原來啲game同setting係同store唔同嘅。人手短缺，明明兩人一更，我一個人企喺counter，成世人都唔打機，舞來舞去都搞唔掂。返工對住舊完全唔識的嘢，好鬼焦慮。打電話俾同樣返緊工嘅人，俾人哋笑喺深山蒲出來，人哋教完我跟手就話，你今日又有嘢寫喇。咁，唔寫都唔啱數啦。
3. 開到機，工作流程都係唔知。打咗去問game公司的marketing哥仔。game公司外判成個promotion，向agency購買服務，agency係出糧就當然係老細，promoter係派遣工。但其實有咩問題，都係搵返game公司。負責外派counter的K哥仔，一聽電話就講Moshi moshi。哥仔你喺日本公司做嘢啫，你請個promoter唔X識聽咖。
4. 原來必須戴住部VR先開得到遊戲。其實我雖然返咗幾個星期，但都幾抗拒戴部機，覺得戴住部機郁身郁勢太戇99。雖然所有客都係咁。為咗要學識啲遊戲，惟有玩咗成粒鐘，連counter有無人行過來都唔知。一路諗住視覺文化堂講的Camera obscura，一心諗住返屋企要摷返本《觀察者的技術》來睇。
5. 由於counter位置太偏僻，我全程拎部kindle出來睇書，睇《斷捨離》睇左兩、三個chapters。真係唔睇書對唔住自己。之前已經聽其他promoters講呢邊出名靜，好似話有人溫DSE乜乜乜，仲有人話住屯門都專登來銅鑼灣返呢個位。
6. 有個來試玩的客，勁似文青版蘇麗珊，手拖住另一個長直髮尖下巴的清秀女子一齊入來，成為一道美麗的風景。又見到慈善羚羊鄧兆尊，好想同佢講，我中學有段時間覺得自己個樣有啲似佢。但惟有msg中學同學，自己笑。
7. 既然無咩做，梗係玩下promoter個whatsapp群組。雖然一早打聽咗，但我專登喺群組問點樣出糧，一個感覺無乜經驗的agent答我，等佢哋計埋數就通知我哋。我頂你，今日5號我仲要等你通知？另一個似乎有經驗些少的agent再答，因為佢哋今日先從各個地點拎返張簽到表，要計完數再俾game公司覆核，需時處理，所以會10號之前通知攞支票。哇，我即係着咗，非常之想開佢拖，7號前出糧是常識吧。不過我都停一停諗一諗，費事太高調，自覺好拿有禮貌咁叮囑佢，犯法咖。
8. 上星期識嘅阿保險神人即刻就whatsapp我，笑我做咩咁躁。等錢開飯咖大佬。呢啲群組，雖然無乜人出聲，個個CD-Rom，其實大家都有睇，而且大家都唔潤。我講完，跟手有人又爆，話臨時唔舒服，有醫生紙都要扣勤工獎，係唔公平嘅。後生仔真係有火呀下！不禁令我檢討下做乜自己爆得咁內歛-皿-。睇睇個更表，呢位爆的朋友，原來真係返到爆晒，連住返十幾廿日嗰隻。等錢駛的朋友，果然係特別夠膽出聲的。
9. 收工，換衫，行樂文。break時買咗杯齋啡，收工買咗2本書，搭埋車，食埋麥記做晚餐，應該都駛晒全日賺的人工喇。bye~
表tag:
