十幾日無返工，留咗時間，返下大陸，寫下文。嚟緊一個月都會返多啲，搵錢去印度。中學好友堅持覺得我係做research。唔係咖，我真係無嘢撈咖 XD。有雜工歡迎介紹。我暫時目標係唔搵工，等工搵我，睇下自己幾時餓死/ 無嘢做悶死。但觀乎現時，應該都仲有排玩。
1. 執衫執到間房出現高及大腿的衫山衫海，於是我搵唔到開工用的黑色長褲。對於鍾情森林系偽文青裙裝打扮的我 ，要整條長褲開工，是麻煩的。從來未做過對衣着有特定要求嘅工。總之最後搵咗對黑襪褲裙裝開工，因此遲咗出門。
2. 12點開工，11點9先上巴士。通知game公司J哥仔，話佢知我會遲15分鐘到，叫佢通知我個partner。竊以為是基本工作倫理。點知遲咗4個字上去，發現拍檔甩底。J哥仔話，一定會調返個拍擋俾我，因為今日出某大game的第15代，一定勁多人上嚟問。又唔count我遲到。咁優待呀。
3. 一個鐘之後，出現咗個神人。佢話佢俾人由銅鑼灣調去尖沙咀，途中又折返銅鑼灣。條友目光呆滯，問卷又唔做，淨係坐喺道打機，神到一個地步，個客要企喺佢側邊，等佢除咗部VR機（註）先有得試玩。
4. 放食飯，去food count食40蚊蛋包飯連奶茶，正。我問阿神人係咪讀緊書，佢原來係做保險的，Engineering畢業咗5年，辭咗份工玩歐洲一個月，開咗個page畫公仔，又搞下speed dating遊戲，乜都玩。佢派咗卡片，又送咗自家製的八達通套俾我。我走去like咗佢個page，幾乎無人like咁滯。呢隻算唔算典型80後，八足咁多爪，又其實無樣精。佢話，周圍識人好容易，做下散工，又教我用meet up app識人搵機會。
5. 講開租樓，阿保險神人話，無諗過搬出嚟住，你諗下，一萬蚊租金，一年就十幾萬，搵錢係要錢搵錢。作為視錢財如糞土的朋友，我梗係唔9理佢。我應咗句，自由係要用錢買嘅。佢繼續吹，點樣可以40歲前搵夠退休。我心諗，唔通我話你知我距離40歲無幾多年咩。
6. 返去繼續悶到抽筋，聊阿神人傾計又唔多睬我，我係咁講hello welcome thank you bye bye嚟自娛。我強逼症到一個地步，走去佢個位執起佢散落一地的雜物紙箱。而佢繼續開大個聲打機，幾X自我，幾X悠然自得，只有我嗰邊人企爆咗，佢先招呼下人。直至收工。神哥仔只係幾好笑，個人又其實無乜嘢。
7. 第二日，我照樣遲到。覺得其實唔駛咁早啦。我的工作倫理好脆弱嘅。轉咗個仲強逼症過我的細佬做拍檔。我執好嘢，佢又要再執過，又教我點用部電視播短片，叫我步驟跟足試一次。咁先似做嘢咖嘛。打機呢味嘢我識條春，梗係佢話乜就乜。
8. 細佬健談好多。佢讀九龍塘大學中文系，我地由古典哲學定現代哲學離地啲，吹到語言應用與流傳，又各自講對先秦各家思想的看法，又講佛教。我話，喺game store門口講呢啲係咪份外覺得自己似返個人。
9. 食飯時間，細佬帶路去茶記。講起鄉下話在我地呢代香港人之間漸漸消亡，佢話問人屋企講咩話好似好無禮貌，佢話，學術都要講禮貌。我輸咗，甘拜下風。仲發現佢同我同鄉，我講我幾歲，佢話佢阿媽大我幾年。頂佢個肺。
10. 我其實都係會話俾人知我之前係喺乜嘢機構道做。細佬問，你係咪嚟體驗下我地呢啲基層勞工的苦況。作為19歲細路，佢散工年資真係不得了。佢話，要體驗，應該去做美心包裝，或者麥記。千祈唔好照寫學歷，識填一定填中學未畢業。
11. 食完飯未夠鐘，2個着住game公司制服的人上樂文睇文學書。細佬竟然只去中三商買書，又話一個禮拜要至少睇一套戲。只能話此一時彼一時，到你做嘢就未必會再堅持。叫佢去二樓書店買，佢又話遠，收工佢話去中央圖書館對面間小眾文具舖，我帶佢去。粉嶺人的細佬，連維園都未去過。我忍唔住話鬼佢，細路可唔可以唔好畫地自限呀。
12. 差唔多收工，promoter個whatsapp group忽然有announcement，話以後返足有勤工，即係時薪變成$48。但又唔講明勤工有咩規條。其他人無乜出聲，只係我同保險神哥出聲問規條。我私下whatsapp問神哥，佢話game公司最少俾每人每小時60至70蚊，agency呢啲果然係無死錯人的。
13. 細佬臨收工講咗句，做呢啲工要頹，越頹，工作嘅麻煩就會越少。我只能講句，確是長知識了。
註：
VR機：VR即virtual reality，是指利用電腦模擬產生三维空間，使用者戴上特製顯示器後會感覺身歷其境。
表tag:
裏tag:
