嘿，我都唔明點解仲有得續。而且日日新鮮，日日都有啲twist，好似慌我無嘢記咁。可能我大驚小怪，亦可能當你有得揀時，呢啲瑣碎而悲哀的小事講出來先至笑得出。
1. Agency日日問，所以我應承咗返資料輸入。因為得我一個返，坐左入game公司office。成日被屌的哥仔J，同另一個同事K，要負責派promoter去各區分行做試玩同市場調查。聽完佢地一輪辦公室無聊是非同叫Ubereat外賣，K無啦啦問J，尋日你話有個promoter打嚟，話好辛苦要求加人工，係邊個？佢話，要check返佢間store人流，如果係少過幾多，呢條友要即炒。又笑J聽到做咩唔即時X柒佢。跟住佢地又講，啲promoter點甩底法，臨開工半個鐘call sick。
2. 其實佢地都唔妥agency公司，覺得唔努力搵人做promoter，最終啲友騎呢，有鑊又係佢地孭，又其實無乜嘢做過。但對話間，同時又講到，原來佢地拖agency條promoter數，都拖咗一兩個月。咁當然係agency出糧在先，再收返公司數啦。
3. 一路入data一路聽呢啲零散工相關的事，我梗係覺得好爽，心諗越返越有趣味，亦同時諗緊點解以前做零散工倡議從來無掂過呢一塊未開發的土地。但估唔到聽到的花生，係同自己下午的命運牽連。
4. 食lunch，唔諗，食mos burger，食左$54蚊，杯抹茶鮮奶要hea住飲，以免太快離開我會忍唔住去對面Starbucks買咖啡，咁就2個鐘人工架喇！
5. 食左無半個鐘，哥仔J打黎，叫我下午落銅鑼灣舖。我即時着咗火，作為一個做咗咁上下多年嘢嘅人，忽然被使來喚去，條氣超頂唔順，個問題係你打亂我整日嘅預算。俾着係以前，我唔屌到佢反肚。但我決定都係坐喺mos burger睇《斷捨離》睇到夠鐘先返上去。
6. 一入就見到阿哥仔，我黑X晒面對住佢，佢似乎係處於覺得自己有權但又其實有啲唔好意思的狀態。係咁say sorry，話臨時幾個promoter甩底定唔知睇錯更表。做data entry返10放6，落舖要收7點，我話我7點約咗人在尖沙咀，佢就話補返車費俾我。好死唔死我着咗條黑色裙，鬼咁襯件promoter衫。
7. 我有無限衝動想走，又唔等佢嗰43蚊一個鐘錢駛。轉念一想，如果一個基層工友會點？會硬食？會嘈佢加人工？或者一樣會辭職走人？我當然好想搭搭下車一走了之，但咁樣太自我了。雖然好係我會做的事。
8. 一路感受住自己眉頭的緊繃同心頭的粗口，去到銅鑼灣舖。setting又唔同，人更加少。企喺道同拍擋妹妹H吹水，個人先放鬆返。佢乜都噏一餐，仲介紹我去做2000蚊彩光脫毛。XD
9. 妹妹H先似game promoter，佢真係識打機，而且仲幾照顧我，但佢細過我起碼10年。名牌大學生，下年1月去英國exchange，平時做開補習，做promoter純粹因為時間就到。佢話我知，原來game公司係俾50蚊一粒鐘，頂佢agency中間食左14%！19幾間舖要人，佢真係賺到癲咗，無奈多數公司唔願意請HR做呢類瑣碎的編更招聘。H話，俾多少少人工，咪有人做囉，待遇咁奀，梗係成日有人甩底。但我同佢今日都係有人甩底下的犧牲者。
10. 收工。我覺得部分好玩嘅地方，係見到識得嘅人對我做promoter呢件事嘅反應。夜晚坐低同朋友食飯飲嘢，我已經話，我都幾肯定今晚一定駛晒我全日人工，有凸。朋友話，完全想像唔到我點樣sell game而唔講粗口，又形容，咁樣係喺香港的working holiday。我則仲係有少少階級的內疚，玩玩下，同必須要做，始終有個差距。
表tag:
