成世人都無落過地，田野考察式做了一日輸入資料的零散工：
1. 朝早無論幾點出門口都係塞車的。車上玩手機的如喪屍，提早開工電話講公事的不絕於耳。我終於明，無Facebook真係世界末日。
2. 好耐未試過做一啲無論做嗰個定叫我做嗰個都唔care的事。同桌學生哥不斷睇自己入咗幾多份問卷來刷存在感，又倒數離開時間。我則用了禪定的專注力來觀察商業工作的無謂。
3. 食lunch自自然然計個飯佔了幾個分鐘的人工。連我都主動去了街市熟食市場食碟頭飯，35蚊包杯熱奶茶，連飲啡的錢都慳返。
4. 資料入咁多又唔會加人工。做到咁上下坐喺度玩手機，覺得對得起份人工有餘。派工作的哥哥話，最好一個鐘入40份問卷，我講咗好幾次，呢個世界無嘢無可能，不過呢個人工，就唔係幾可能囉。
5. 兩個同桌討論可否着短褲返工，我話如果真係要我地咁尊重間公司，佢係咪應該俾返張臨時卡我地去廁所呢。典型辦公室大廈設計，出入要拍卡，我地三個輪流睇出面reception有無人借卡去廁所。我忍唔住俾說話人聽，兼職都要屙尿嘅。
6. 基本係似做職業輔導多啲，學生哥一邊做，一邊係咁問我同另一個畢業剛兩年的男生，做咩工好。佢似乎咩都想做，又咩都唔想做。俾着以前我實藐爆呢啲o靚仔，依家我只能夠話，路唔係諗出來咖，切實搵份工做住你就會知自己條路點行。老seafood並非一日練成的。
7. 學生哥係相當靚仔下（重點誤）。乜兼職都做過，又係救生員，但完全對未來迷惘，到底應該搵錢、搵理想、搵自主生活、搵安穩，毫無頭緒。我覺得教育制度要出事出到一個地步，先可以有類人狀綿羊出現。
8. 另一名哥仔，畢業兩年，因為人事，辭咗份工，去了日本台灣旅行兩個月。又問我見工應該點解釋。其實我真係想同佢講，工呢啲野，係你就係你咖啦。佢聽我講一條友去東南亞，覺得不可思議，同埋佢講得太多次女仔同男仔嘅分別，去到個位我忍唔住問到底邊度嚟咁多分別。
9. 因為我實在入得太快，剛畢業哥仔感到莫名壓力，不時話要追上進度。佢又教學生哥未畢業就要早早搵工。我沒好氣話有排你捱又何必急住捱。因為遲到，我最後決定做多5分鐘先走，廢事被扣鐘。而哥仔見我唔走，又唔敢走。後生仔，勇敢啲啦。
10. 剛收到agency電話，聽日落舖玩。扭擰多嘢，車費都俾埋我。我話我完全唔識promoter做咩咖喎，佢都殺。吖，到底佢本身食咗我幾多錢呢下？
