「人生不如意的時候，就當是放一個長假吧！」
作為一件有良好生涯規劃的80後，人生中段出現天氣不似預期的縫隙，開展了香港working holidays的日子。有苦有甜才是人生嘛。在這個特殊時期，逼自己學習隨遇而安這種能力，踏上了散工之旅。我都真係去重溫左一次廿年前的《悠長假期》。
上半生過得太理所當然，個人又大驚小怪。每個挑戰都是一個任務，讓你學曉你本來就要學的事。
一、別人的眼光其實沒那麼重要
多年正職以後的第一份兼職，是做遊戲推廣員。着住件制服，照鏡望到會認唔出係自己。這就是制服的功能嘛。第一次企喺尖沙嘴海港城人來人往的舖面，我開始諗，如果俾朋友見到咁點算，尤其多年不見的同學，人地會明你做緊咩嗎？會唔會俾人笑？當你開始忙到無咩諗得到，轉眼就一day收工了。
事後諗返，點解覺得自己做推廣員就唔想俾人知？有咩唔見得光？望個表面就笑你的朋友你還care嗎？個社會慣左用你做咩工、搵幾多錢、消唔消費得起諸如此類去評價一個人，你想唔想自己係咁？忘記每個人都是一個美麗而充滿夢想的靈魂，覺得一個人對社會來說只有其職業是有價值的，你係咪真係覺得你只是一部工作的機器？
只怕你看不起自己，其實無人看不起你。
二、人的價值不在於工作的階層
雖然打散工好多時是食物鏈最低層，一間公司裏面最唔想做的工作，就會判俾散工做，人工又奀，的確是有些人有白鴿眼，覺得不值得給你一個笑臉，例如做推廣員會被舖面長工無視或者老點，做helper又要做埋打雜買下外賣咁，又聽過學校飯堂阿姐講，有老師嫌佢搬垃圾臭而投訴。但老實說，你會發現decent的人不會介意你是散工不是散工，都一樣會對你好。而傾落計，佢地會尊重你的見識，尊重你的經歷和修養，而這些都不是學歷和職位必然附帶的。
以前好緊張的前途，好重視的所謂生涯規劃，其實都係資本主義的洗腦工程。有為了畫畫而辭掉工作的老友，社工畢業做散工去打工換宿的學生，旅行時遇過寧放棄黨席和公務員身份、辭工流浪的大陸人，也有揸架電單車從廣西、老撾、泰國玩落去的無業遊民。邊個話要一份工一個身份打死一世。
三、人人都是有故事的人
我試過同推廣員拍擋討論中國哲學，又同印度人老細傾過他的人生轉折和選擇，做data entry有小朋友問面試技巧咁，有個妹仲教我去做彩光脫毛添。
我好鍾意撩人傾計，如果唔係做嘢會好悶，做散工一個月轉幾份工咁樣，其實識到好多人，越來越多人選擇打散工，各自各有背後的故事和人生選擇，背景不一樣，生活環境南轅北轍，價值觀相近，與人連結就快樂。
四、你是你本身的傳奇
既然人人都有自己的選擇，你也一定有自己的原因。
將會有二萬個人問你，你有無諗過將來，知唔知自己想做咩。你亦要好堅定，好清楚自己到底做緊咩，哪怕你將要一日每隔四個鐘向人解釋三次。有時真係煩到，X，關你鬼事。但當家人都咁問你，你不期然就有啲沮喪。畫畫多年的朋友話要定時將自己產出post出來俾世人知道，又話facebook唔可以寫得自己太慘（佢指我）。
上一輩未必明白你做乜唔駛定時定候返工，唔明做乜讀咁多書唔搵份穩定的工。其實可能只係開始時錢會無咁鬆動，月光族無積蓄更甚。而嚴格意義來說香港大部份都是就業不穩啦頂，幾時都係隨時炒魷無補償，所謂穩定在現代的液態社會，紐帶早已土崩瓦解，馬克思早就話一切堅固的都會煙消雲散，但你真係唔可以預期你老豆老媽同你讀鮑曼囉。
（待續）
表tag:
