編按：Pokemon Go終於抵港。一時間人人變成精靈訓練員，紛紛走上大街小巷修行。但修行是一回事，惟工新聞提提大家要注意安全，事關在外國已有不少與Pokemon Go相關的意外發生，從車禍到劫案都有。為免樂極生悲，惟工新聞特意轉載工會幹事劉家樂的文章，讓各位身兼打工仔的精靈訓練員了解修行期間的勞工權益。
不正經勞法小知識：外勤工作捕捉Pokemon注意事項
文：工會幹事劉家樂
Pokemon go等左咁耐終於來到香港，小弟我教完班之後出街，就發覺勁多人開始喺唔同嘅地方聚集捉怪。返到office直頭發現好多同事唔見左人，我估計班仆街應該走晒落街捉怪咖啦，唔怪得旺角區個GPS慢到癡晒線。
我個家姐今日開始玩呢隻game，仲話一陣去政總送文件覺得好開心，所以我想同大家講吓，外勤工作時捕捉Pokemon的注意事項。（首先，如果你係一個由頭坐office坐到晚嘅打工仔，而你個位置又係補給站同補給站之間嘅空位，咁就唔關你事了，你都係返去做嘢啦。）
一：小心撞爆頭無工傷賠
我好明白有啲工友係會有非常多空閒時間走落街捉嘢，特別知道比卡超、超夢夢喺樓下嗰時，相信你開緊會都想扮肚痛走落樓。但記緊呢個時刻，有好多人隨時同你一樣衝落樓，但一個唔小心撞爆頭就慘（被靚女撞例外），因為喺《僱員補償條例》第五條「僱主就意外引致僱員死亡或喪失工作能力而支付補償的法律責任」第三項明言：
「在根據本條例進行的任何法律程序中，如經證明僱員受傷可歸因於其本身犯有嚴重和故意的不當行為，或僱員蓄意加重其在受僱工作期間因工遭遇意外所致的傷勢，則有關該損傷的補償申索須予拒准」
因此，假如你自已無啦啦走落街捉怪而無上司指示，被人撞爆左個頭，其實係有機會不獲工傷賠償，更甚者可能被老闆以不當行為而即時解僱。
二：坐老闆車捉怪有得賠？
我了解到最近有人建議揸車去捉怪，或者坐車返工時坐多兩個站，捉多兩隻先返工。其實大家都明白，如果你坐坐吓車去捉怪，出事被車撞，其實係無工傷賠。我都唔排除有老闆增加員工褔利，車個員工返工時順個便行多兩轉路去捉嘢。但大家記住小心，特別係揸公司車去捉怪嘅人，《僱員補償條例》同上一條有提過：
「如僱員遭遇意外時，僱員正在其居所與其工作地點之間，駕駛或操作由僱主或僱主的代表安排或提供的交通工具，或由他人依據與僱主作出的安排而提供或安排的交通工具，並採用直接路綫前往下述地點，則僱員遭遇的意外，須當作是在受僱工作期間因工遭遇的意外……」
採用直接路綫前往工作地點是十分重要，假如你發現下個街口有嘢捉，而選擇走多兩公里，最後出事，其實係有不獲賠償的風險，因為你並沒有採用直接的路線。
三：比錢走去打道場？
有人會選擇返返下工走左去，或者選擇直頭射波唔返工，用一日時間捉晒一區既怪。每人選擇都好唔同，但隨之會有咩後果？就係除咗無咗一日人工外，可能會無咗其他嘅錢。一般而言，好多老闆會係你嘅人工上面，加插一啲條件性獎金或津貼，例如要求你一個月唔放假唔早退唔遲到，就有多筆錢，反之你就會被人扣錢了。
所以當你決定放心力去做訓練員時，最好睇下合約嘅工資組成部份，假如你咁樣走咗去，可能會不符合領取一啲津貼同獎金嘅要求，所以往往損失嘅會更多。如果你支持到最後一日先嚟被人扣錢，幾慘？
四：捉怪遲到點樣算？
行行下街發現有怪捉，但就來遲到，點算好？唔理啦，遲就遲，最多咪扣鐘錢？咁我要同大家講下僱傭條例下，僱主可以合法扣薪既情況了。
跟據僱傭條例，僱主只可在下列情況下扣除僱員的工資：
1.僱員缺勤，但只能扣除實際缺勤時間的工資；
2.僱員因疏忽或失職而損壞或遺失僱主的貨品、設備或財產，每次只可按值扣除，但以不超過$300爲限。此外，在這些情況下扣除的工資總額，亦不得超過僱員該工資期所得工資的四分一；
3.僱主預支或多付給僱員的工資，可按數扣除，但不得超過僱員該工資期工資的四分之一；
4.僱主供應給僱員的膳食及住宿費用，可按值扣除；
5.若僱員以書面提出要求，僱主可在工資中扣除代僱員繳交的退休計劃、公積金計劃、離職金計劃、醫療福利計劃或儲蓄計劃的供款；
6.僱主借給僱員的款項，但必須獲得僱員的書面同意；
7.若僱主在僱員提供所需文件前已支付侍產假薪酬予僱員，但僱員在放取首天侍產假後的三個月內或離職時仍沒有向僱主提供所需文件，僱主可從僱員工資中扣回已發放的侍產假薪酬；
8.僱主根據任何法例的規定或獲法例授權，可扣除僱員的工資；
9.僱主可以根據法院發出的扣押入息令從僱員的工資中扣除僱員尚未支付的贍養費。
有無遲到扣人工？
有無遲到扣人工？
有無遲到扣人工？
高等法院曾就著一個扣薪案件有解說，就是解釋遲到而扣薪是違反僱傭條例。因此僱主並不能因員工遲到而扣錢，當然，你遲得多，隨時被人炒的……
講到呢度，我都係去捉怪了，有唔明再問，係咁先。
表tag:
縮字:
編按：Pokemon Go終於抵港。一時間人人變成精靈訓練員，紛紛走上大街小巷修行。但修行是一回事，
