編按：截至2015年11月中，去年與建造業有關的致命意外為18宗，當中一半涉及從高處墮下事故。因此，有議員提出禁止使用俗稱「飛棚」的懸空式棚架。工聯會屬下的建造業總工會等工會，隨之與承建商組成竹棚業大聯盟，遊行反對禁止飛棚。單靠數字，外行人或難以理解飛棚業的情況，工業傷亡權益會撰文解釋飛棚的危險之處，引述意外身亡工友之親屬撰文，與及工傷工友自述，惟工新聞特此轉載。
「買勞保要15萬一年；無買勞保，工人死咗罰款3,000了事，如果你系老闆，你會點揀？」
前三篇都講咗飛棚既危險，導致每年都有兩三個工人死亡，多人受傷。呢個行業實在問題處處，由工作安全到保險制度都比其他行業多困難。
基本上小型嘅棚公司好難買到勞工保險。因為實屬高危行業，而小型棚公司一般安全設備都不及大公司，因此保險公司不願意為其承擔風險，即係唔受保。於是小型棚公司只能購買聯保。雖然最後都有公司承保，但保費貴到嚇死人。以一個有中工牌的棚工為例，每年保費大約15萬，師傅級就更貴，而且以人頭計算。即係話：棚公司越多工人，保費就越貴。於是，好多老闆都寧願冒險，唔幫員工買勞保，或者只買一兩個人頭。結果點？工人受傷死亡無保障，或，一公司如果同一年內有幾個工人受傷，結果就有人有得賠，有人無得賠。
唔係話，老闆唔買保險，要罰款10萬及監禁半年咩？
例還例，實際執行不如人意！2013年一宗棚工墮樓死亡意外，老闆無買保險，結果判罰……1,500蚊。啱，你無睇錯，的確是港幣1,500蚊。家屬反對，作出上訴，增加一倍之後先不過3,000蚊！一條人命呀，先值3000蚊！買勞保要15萬一年；無買勞保，工人死咗罰款3,000蚊了事，如果你係老闆，你會點揀？老闆付出的成本低到咁，點樣指望佢哋會做好安全！
本來，老闆無買勞保，出事後，就需要一力承擔工友或家屬的賠償，但老闆可以逃避責任。無錢，等工友、家屬一方申請老闆破產，律師先可以喺僱員補償基金申請賠償，動輒4至5年。折磨工友，折磨家屬。
業界部分棚工驚禁止飛棚會打爛佢哋嘅飯碗，可以理解，但大家不妨深思，如果一個工序係咁危險又咁無保障，點解仲要用條命去搏？而飛棚絕對唔係唯一嘅工序，可以用吊船。或者大家諗諗，可唔可以做到用飛棚之前要特別申請，等政府部門視察過安全先開工？
