編按：今晨，兩列行經金鐘至中環站的港鐵列車相撞。從照片中翻側變形的車廂可知，如果發生在正常載客時段，後果不堪切想。但不論地鐵炒車還是十號風球翌日，無良老闆總會想盡藉口剋扣員工人工。今日多間媒體提到扣人工，甚至列出算式教老闆可以怎樣扣。但其實，因為地鐵炒車而扣人工，一方面完全不合情理，另一方面是否合法？個人及社區服務行業職工總會總幹事劉家樂撰文為大家詳細分析。
文：個人及社區服務行業職工總會總幹事 劉家樂
今日新聞，一定係講地鐵大撞車。而撞一撞車，香港打工仔都無可避免要趕番工甚至遲到。工會發現坊間有好多媒體同組織都講起遲到能唔能夠扣人工既問題，首先工會都好感謝大家在這時候不忘宣傳勞工權益，但有d野我好想講兩句，就係：扣唔扣得人工？
有好多組織或媒體，都指出僱主是可以因員工遲到而扣人工，香港01更出曬算式教大家點樣講老闆應該點計算個時薪而扣。的確，一遲到就扣$500，一定唔得，但其實應該扣幾多？又係唔係可按實際遲到而計算時薪咁扣？
其實，答案係除非你本身係時薪，又或者係有勤工獎而勤工獎講明不能遲到，否則點！都！唔！扣！得！
《僱傭條例》 第32條 "扣除工資的限制"講得好清楚，只有以條文下情況可以扣除員工工資，而大家常見既就係呢條：
(a)因僱員缺勤而扣除工資︰但 ——
-如根據僱傭合約的工資是按時計酬者，則因缺勤而扣除的工資，不得超過與該僱員缺勤時間成比例的款額；
大家要望清楚，佢講緊係員工"缺勤"可以扣，同埋如果員工人工係計時薪，就可以按缺勤時間成比例扣。但係一個員工如果"遲到"，佢有無"缺勤"？答案係無。咁法例講明係缺勤，唔係遲到，咁點解可以得出遲到可以扣人工既講法？
講你唔信既話，大家可參考案例《 麥永富 訴 滙進髮舍 HCLA 42/2000 》以下判決內文：
11. 香港法例第57章《僱傭條例》第32條規定：除卻該條文所列明的情況外，僱主不得從工資或應付予僱員的款項中扣除任何款項。第32（2）條所列明可扣除工資的情況並不包括僱員遲到的情況。因此，僱主是不得以僱員上班遲到而扣減工資。 答辯人指上訴人是明白這些公司規則後才接受聘請，但即使僱員同意，僱主也不得以遲到為由扣薪。《僱傭條例》第70條規定：任何僱傭條款，如抵觸或減少《僱傭條例》所賦予僱員的權利、保障等，即屬無效。答辯人指所扣的款項是用作同工聯誼褔利之用，這點亦不能構成僱主以僱員遲到扣薪的憑籍，因法例不賦予僱主因僱員遲到而扣減工資的權利。
『第32（2）條所列明可扣除工資的情況並不包括僱員遲到的情況。因此，僱主是不得以僱員上班遲到而扣減工資。』
『第32（2）條所列明可扣除工資的情況並不包括僱員遲到的情況。因此，僱主是不得以僱員上班遲到而扣減工資。』
『第32（2）條所列明可扣除工資的情況並不包括僱員遲到的情況。因此，僱主是不得以僱員上班遲到而扣減工資。』
好重要，所以要講三次。
所以，如果有人真係傻豬豬走去同一個月薪員工計佢時薪幾多，然後按佢遲左幾多扣幾多，真係可以省番淡氣，係法例下面，你跟本就唔可以因為員工遲到而扣人工。而"缺勤"同"遲到"屬兩種不同的事實情況，因此是不應輕易把缺勤視為遲到。
大家好有心，希望教育d癡線老闆唔好因為員工遲到就一筆過扣幾百蚊，但講還講，可以再望清楚，又或者問下唔同工會既師兄師姐先。
#遲到
#扣薪
#僱傭條例
#扣到唔可以扣人工
#遲到唔等於缺勤
#亂up
#我唔係針對你一個我係話在座各位都講錯
