1. 岩岩上咗保險公司見工，做大學校園問卷調查員(我的人生到底哪裡出錯了XD)。我申請時唔知係保險公司，諗住hea工就無謂着得太勁，牛仔褸配黑色燈芯絨長裙，背囊放notebook順便去自修室碼字。
2. 點知人地搵個地區總監嚟見我，入到office最入嗰間大玻璃房。穿過一整層的辦公室，目測receptionist個袋應該貴過我全身打扮。阿總監光頭中年再上少少，高大decent。不過銜頭似是吹出來的多。我介紹完自己，佢話望住我張cv話，你一年都轉一次工喎，我話，我對上一份就做咗5年嘅。佢望一望機構名，問我即係邊道，工商聯？我話係香港職工會聯盟，死都唔講簡稱，博佢唔識，佢真係唔識。
3. 佢話「好curious」我做勞工團體呢啲工有幾多錢人工，我講完大家失笑。然後佢又講，好多時出來追求自己的理想，發現理想同生活背道而馳，做保險呢，可以發展到自我，對好多人，又幫到人，又搵到錢又唔駛放棄自己的興趣。我心諗，但我有原則同對自己的標準喎 (no offense to 金融界別人士，人各有志)。
4. 佢問我，讀完書諗住做咩。佢話，你都唔係幾諗搵錢，我幾大都話，係呀，夠糊口就得。等佢唔好再同我吹保險經紀有幾大人生意義。佢只能話，ok I admire that.
5. 話說份工係坐公司車到不同大學搵國內學生參與internship，不涉及銷售成份。佢話，你3X歲啫，都唔算離開校園好耐。我又笑了。又講下自己識啲學生咁樣。
6. 然後吹咗去無雷公咁遠，講下我做乜對勞工咁有興趣，我淺談作為知識分子的位置，佢又噏下佢自己對personal development有啲研究。其實都係一位decent的叔叔，只係同我是不同世界的，我亦對嗰個世界無興趣。走時佢送我出去搭lift，我話我以為係一份比較簡單的工作，佢話，想每個崗位的人知道佢份工作背後的價值，會做得投入啲。都啱嘅，做管理層是咁做的。
7. 又睇下佢聽日會唔會call我開工。1000蚊日薪喎。而下個月頭的珠寶展booth helper，有着落了，去Asia World Expo，60蚊一個鐘另加每日50蚊車費，唔包飯鐘。又做下囉。個agency問，仲有無朋友想做，介紹個男的，佢即刻話，男的崗位已滿，佢地依家搵女仔。係咪可以去平機會告9佢喇？
8. 又接下寫文的散工。話說之前心想如果有studio工作就好。無專登搵，輾轉有朋友找人合租band房。等待成事中。希望能提升碼字的工作效率。世事都自然有安排，做人是是但但就好。
