細個本着捧餐都唔夠力的覺悟努力讀書，於是去咗大學女工合作社飯堂玩咗兩日，孱仔如我攰X到呢。又見「團體」、「阿姐」，當然地勾起好多做女工組織的記憶同技能，阿姐團隊合作及建立，挑戰既多而獨特，不過呢啲留返俾自己觀照好了。
飲食業實在是第一次做。其實，我又ok開心喎。女工合作社做小食及午市碟頭飯，未至於茶餐廳咁把炮。除了剛開始比較緊張，埋位我有時會邊哼歌邊做。洗洗切切備料就最治癒，煎雞扒時我已經哼緊歌，今日一邊煮麵仲可以一邊唱幸福摩天輪。體力勞動，腦袋放空，重覆性動作做得多，確係會越做越找到秘訣。
但不代表唔辛苦喎！
先是長時間站立，腿痠軟。做每個位置都係企，廚房再乾淨，都係地滑，煎完扒周地都係油，洗嘢又會濺到水，着行山鞋都企唔穩，即使只係裝完飯轉身再去裝埋個兩餸，都要用返些少力先企得穩。為了就手，只轉腰不轉身，脊椎側彎的痛即刻黎料，咁我寧願郁腳都唔好傷腰啦。尋日收工同人哋去行街，坐喺food court腿攰到唔願行，連等位的開到聲，我地都唔肯郁。我就係腳掌同膝頭對上的肌肉發熱。食飯時仲俾阿姐笑，咁後生就攰。我就由細都係咁打壞嘅。
終於一嚐洗碗滋味。過年後的學校，午市已不算多人，講緊我相信係一百隻以內的碟。原來係會先用強力水柱沖走飯菜，再用熱水開小蘇打浸碗，去油係快，再抹，然後過水。喺屋企未戴過手套的我，自動自覺戴住膠手套都覺啲水熱，隔離過水個靚姐唔戴，作為家務助理工會前幹事，我地一路洗我就一路諳諳尋尋，話佢唔戴手套洗碗（主婦手係雙手長期濕水、接觸化學劑造成的），佢就一路講自己主婦手有幾痛。事實是我只係洗咗唔知有無一個鐘，洗完都覺得雙手好乾。對洗碗阿姐來講，啲渣好麻煩，我以後出街食飯會食到一粒飯都不剩。而小食已是用紙杯碟唔駛洗，講環保與效率係咪真係唔可以並存呢。
今日做煮麵位。當年喺hall諧音「低調麵」的營多撈麵。都唔知做咩啲仔咁鍾意食撈麵，亦唔知自己今日煮咗幾多個麵。一係煮得耐，我隻手指公係會淥熟，二係，阿姐提醒，久不久要換麵水，因為衛生幫（定期有衛生署同學校管理來檢查飯堂衛生情況？）話麵水煮得耐有鈉喎，我就覺得成面都膠咗囉。眼見有人一日三餐隊三個麵，我好想同同學們講，食得多即食麵會陽萎架，你哋信我啦。其實煎扒都吸埋吸埋好多油，一路煎一路諗起，有本書叫廚房之舞，講婦女好多有鼻咽癌，都是煮食油煙之禍。阿姐話，對住個爐，個人特別涸，飲幾多水都唔夠。
收檔係最辛苦，真係辛苦。同阿姐去倒垃圾，佢刻意提醒，如果架Lift入面有老師呢（？），就唔好入，試過因為用職員專用lift運垃圾，有老師投訴啲垃圾整到架Lift臭哂。我真係着咗火。貨係有，但離垃圾房遠，佢地日日倒飯堂咁多垃圾，要兜遠路真係腰都俾埋佢。
廚房果真係危機四伏，尤其熱野多，好易燙傷，而且急趕的廚房好容易有勞損，除了要有技術，都幾需要有平和的心，否則爭執會有，緊張暴躁也有，對精神都係一種勞損。
整咗兩日野食，真心講，女工合作社真係好衛生同有良心架，而個衞生係好多人做多好多工夫而得來的，所以有良心。營運操作，好多實務技術，見阿姐搞爐頭搞電掣，我成日都講，真係百無一用是書生。
這個月於我來說，是放空後回到慣常，重投自己喜歡的範疇工作，雖然仍是散工。由女工飯堂開始也算不錯，真心鍾意同阿姐傾偈相處。
