藝術家常予人一副社會上流、不吃人間煙火的印象。對整個社會來說，多數人都會將藝術家當作商業畫廊的藝術家，靠賣作品為生，但實際上藝術家的創作，以致是為生方法五花八門，實不能夠一概而論；不用顧掛生活的想像，亦只存在於鏡花水月之中。是次訪問，請來了最近帶頭提出創立藝術家工會的獨立藝術家黃嘉瀛KY，及阿傑（化名）、阿輝（化名）兩位藝術家，分享生活，也談論工會的展望。
性格豪爽的KY是近年經常曝光於媒體的藝術家，性格活潑豪爽，接受訪問期間不時與阿傑挑起話頭，繼而大笑。偶爾無厘頭、衝動的性格，卻引起了工會的開端。「無咖，做嘢嗰度有部影印機，咁要印啲表俾人填入工會。咁啲朋友成日都話要搞工會，又睇死我搞唔到，咁我咪整兩張表出嚟俾人填。」KY笑說。
「藝術家唔係high-end職業，而係要搵食」
KY畢業於中文大學藝術系之後，除了策劃不同的展覽項目，平常日子主要靠各種散工為生。「之前有幾個project（指展覽項目）係有錢嘅叫做有得用之外，平時撈緊保險囉，仲有做過啲賣炸雞呀、揼骨呀嗰啲乜都做下咁囉，要搵食咖嘛大佬。」
輕鬆的語調之中，能夠聽出KY實際上有好好思索過藝術家身分的種種。她在訪問中一直強調，並不是每一個藝術家都像大眾想像一般，不但被推崇，更毋需顧慮生活。「藝術家唔係一個好high-end（指上流）嘅職業，而係要搵食。社會嚟講，會覺得藝術家社會地位好高，而同佢地嘅勞力係唔成正比嘅，但其實唔係囉，我地係service provider（服務提供者），我地係無乜保障嘅。」
拖糧欠薪 騙徒伎倆層出不窮
被問及在怎樣的情況下藝術家的生計不受保障，KY提到現在的圈子內，藝術家應該有的待遇很多時會被機構故意弄得「曖昧」。「有時同一個機構合作，佢拖你成年數都唔俾錢，你只可以私底下去提人地小心，又或者喺opening（展覽開幕）先同佢私底下斟咁，但係你又唔想冇咗往後展出嘅機會，但係錯嘅又唔係我哋呀你明唔明呀。」
消息不流通，加上藝術家永遠都是獨自面對不同機構，不幸遇到不公平的待遇，也只可以「同朋友呻」。KY提到：「邊間畫廊好衰嗰啲，簽咗約，轉個頭同個買家標高個價但係又唔分返錢俾你，咁你又唔可以對間畫廊講啲咩（怕失去合作機會），只可以私底下鬧佢係仆街嚟，永遠無人聲討佢。」
即使是非牟利的機構，亦會為了減少開支不時想盡辦法，招募藝術家「捐贈」自己的作品予機構。「要求你做嘢嗰啲人，譬如做慈善嗰啲機構就會俾個假嘅光環你啦，你幫咗呢個計劃呢你又幫咗人，我哋個機構又係好出名咖啦，大家都會係互惠互利咖啦。個假嘅光環就會令我地無諗到，其實我地出咗好多production fee（創作成本），無人俾返我地啊。」更甚者，有些機構在免費獲得作品後就「自己拎嚟賺錢」，藝術家卻是分文不賺。「所有勞動都係免費，但又擺個排頭出嚟係有認受性，咪俾個假象你以為擺得出嚟就係藝術家，但其實唔係咁簡單。」
從以上種種例子可見，期望展出作品的藝術家們，除了要顧好自己的創作，更重要的卻是打好人際關係，加上少許運氣，才有機會曝光在聚光燈之下。結果「友情、交情」便成了機構的擋箭牌，免去合理工資的必要。就如阿傑所說：「做藝術家咪好似做娛樂圈咁囉！呢一行好多嘢講友情、交情，好多嘢都唔會攤上嚟講。」而當中經常「唔攤上嚟講」的，就是藝術家的待遇、收入。「我地出糧又唔係跟長約出嘅。當然有啲跟咗畫廊嘅藝術家係跟長約，但大部分都係口頭承諾嘅、無簽長約嘅、根本就係清潔工零散工咁。」
政治打壓 創作自由屢受壓迫
除了有關生計的問題，KY亦有提出藝術界所面對的一些政治打壓的事件。「其實Sampson Wong之前ICC單嘢之後，成日都蠢蠢欲動想攪下屎棍咁。」KY所提及的事件，是指藝術發展局今年5月舉行的「第五屆大型公共媒體藝術展：感頻共振」中，發表聲明指藝術家黃宇軒和林志輝《從現在開始，我們就是六十秒的朋友》的作品偏離展覽主題，決定將作品剔出展覽。作品最後一分鐘的影像，是倒數距離2047年7月1日剩下的秒數。事件引來藝術圈不滿，亦引來對藝術發展局政治審查作品的嫌疑。當中最被詬病的，是藝術發展局在處理事件時閉門作業的不透明。
阿輝又提及，今年立法會選舉前選舉事務處突然去信十多個藝術團體，指其組織喪失功能組別「體育、演藝、文化及出版界」團體選民投票資格，當中時間的倉促、不清晰，也引起文化界的批評，卻無力作出任何行動。
成立工會保衛藝術家權益 「用輕鬆力量凝聚大家先」
聊及成立工會的契機，KY指設立工會在藝術家之間是偶有提及的事，但一直沒有人動手。一如前述，很多不同藝術家所面對的機構待遇，以至各種政治議題，「唔講，除咗圈內嘅人都唔會知」。「每次呢啲事都會停留咗喺討論呢個階段，之後去我份人就比較衝動，我諗一人拉十個朋友，咁我有幾個朋友一人十個，都叫有幾十人咁。」
由到展覽開幕派發表格，到Facebook發帖邀請藝術家友好填寫網上表格，到訪問時為止，約有200多位藝術家聯絡了KY，表示想加入工會或參與籌備工作，當中有藝發局登記藝術家、表演藝術家，以及攝影師、設計師等，由剛剛畢業到圈內很熟悉的前輩也有，可見工會的需求亦頗高。
提到初期的工會方針，KY希望「用輕鬆力量凝聚大家先」，避免大家對工會成立感到有所負擔，先凝聚大家的力量。
對於工會的實際效用，KY指除了保障藝術家面對不同機構時的權益能夠受到保障，或是讓藝術家有更多的資源可以共享（如展覽的剩餘物資）之外，面對某些制度、各種需要公開回應的事情，也有更大的談判力。「最主要係想有個平等嘅平台去交換資訊囉，大家保護大家。」
先起步再算 「你搞起咗就會有好多人出嚟指指點點」
阿輝同時指出，成立工會能夠長遠對藝術圈的政治生態有正面影響，如工會能夠作為一個勢力去談論、要求藝術發展局作出更好的資源分配，或是提供一個更自由、減少政治壓迫的創作空間予藝術家。「譬如面對住ADC（藝發局）閉門作法，有個工會就可以分擔咗個個人壓力坐低傾，等往後有啲乜發生都可以預備，監察都可以做得好啲。」他亦提到藝術發展局早年曾參與一些研究工作，設立工會可能可以提供壓力，令藝發局作為公營機構，負起責任去做對界別長遠發展有用的工作。
對於成立工會所遇到的困難，KY有提及過藝術家的工作性質不如常見的合約員工，有些傳統工會爭取的福利、條例也不能套用在藝術家工會的框架內。「例如係合約員工長工、勞工假期我地都係無嘅，依家比較似零散工工會。」藝術家設立工會的特殊性，也令她們的籌備工作複雜了不少。
現在工會的設立實際上只是開端，很多的定位、行政都未開始實行。「依家一個人處理唔到咁多嘢啦，需要之後有啲發起人同理事，一啲有經驗嘅人幫我咁嘅。乜都唔識嗰陣就係咁，亂嚟。」她指自己並不是做了很多事，只是開頭設計了兩張Google文件，在Facebook宣傳入會、選擇開會時間等。「但係我覺得一句嘢講得好啱嘅。好多資深嘅人都同我講『你搞起咗就會有好多人出嚟指指點點咖啦。』咁我咪邊做邊學囉。」
表tag:
裏tag:
縮字:
藝術家常予人一副社會上流、不吃人間煙火的印象。對整個社會來說，多數人都會將藝術家當作商業畫廊的藝術家
