<我們的盲人工廠>
撰文| 單永生（盲人工友；前工人代表）
2019年3月28日
■我做工人代表：人人為我，我為人人! 現在卻不民主...
我叫單永生，由2005年至2017年做了十屆盲人工廠工人代表。當時我抱住：「我為人人人人為我既服務精神!」同廠方多啲溝通，爭取加人工。亦傾下辛苦一年，食好啲，去旅行等等改善服務。我哋工友代表是每個部門選一個，最多票數就得，尚算叫做民主制度。我做工友代表，會為大家的利益，以工友的角度去爭取權益。不過呢啲都成過去啦。2017年取消咗工友代表，轉為小組會。現在，工廠抑壓民主制度。輔導會整個架構都是行政主導，先由職員決定，再匯報服務使用者、工友及學員，所以就不民主。尤其是這次在工廠重建的問題上......
■第一代老工人：盲人工友的尊嚴!
其實，盲人工廠不民主，並非第一日既事，由我爸爸年代開始。我爸爸1958年接受培訓，1963年正式成為第一批盲人工友，1968年第一次參與工潮。係香港起盲人工廠，係由英國盲人提出既。結果，香港盲人輔導會經賽馬會撥款，在土瓜灣興建第一所盲人工廠。1963年開幕時，共有300多名失明工友，職員師傅人數不多，生產木箱、可樂箱、啤酒箱、粉筆、粉擦、掃把、地拖、車衣、文件繩部等等。而1968年工廠爆發的工潮，是為了調整薪金。因為當時每月工資得40元，最高60元，工人要求月薪有100元。可惜，工人訴求未達到，甚至炒15位工友。後來再爭取，廠方先答應改善。
第二次工潮是1971年。當時，輔導會要轉型為訓練中心，趕工友出去工作，但好多工友都不想，於是罷工。工潮得到大學生、杜葉錫恩支持，工友在天星碼頭嗰邊靜坐半個月，有大學生供給水食物。後來，工潮得以平息。到九十年代，慢慢發展出工友及學員制。現在，工友及學員工資不同。工友按最低工資時薪34.5，其他獎勵案分數及多勞多得制度。學員就每日得 26.5津貼。
1971年後，爸爸出過去美亞公司，做漂染廠染色工作。之後結識我媽媽，拍拖結婚生小孩。點知，我媽媽突然有事，不能照顧小朋友，就由我爸爸一手湊大三個兒子。九十年代，爸爸返盲人工廠做，1998年退休。跟住去失明人協進會做義工導師，教新失明人士學行路。2004年工廠再聘用返佢，做到2010年結束工友生涯，轉左學員身份。直至現在，將近十年，總算老懷安慰。但工廠重建，要我地暫時搬去去屯門，實在太遠了。
■我與老婆工廠相識：又喊又笑，互相扶持!
除左我同爸爸係工廠，我老婆都係工廠工友。2009年，我見到一位女工友 ，佢初初入嚟做，好被動。當時坐我對面，我嘅背脊對住佢。後來，佢覺得好凍，因為對住冷氣口。於是佢調位，調嚟我嗰行，我就常常望住佢。我覺得這個人好特別，內心好多唔開心的事。有一天，佢突然問人借電話叉電，我自告奮勇：「我有叉電插蘇!」借畀佢差，佢唔該我，我問佢攞電話。
佢又驚唔夠數。因為我地人工都好低，57元底薪，之後的包數是斷件計。然後，無意中，我爸爸約佢在將軍澳吃飯。果日我要玩音樂，不在工廠。到我約爸爸晚飯，先得知到約埋個工廠女工友。我感到奇怪，但請埋佢食飯喇。我同爸爸爭住畀錢。結果，都是我畀錢。
正式拍拖係2010年1月24日。當日因為我爸爸突然唔見咗銀包，本來我約左女朋友三點鐘，結果延遲三點半。我哋相處到結婚，經歷重重考驗，但都跨過。起初我唔知佢有冇信仰，我以為佢只為咗我先信耶穌，但佢原來早已接受，但冇人好好栽培。我地有喊又有笑，有發脾氣，亦有互相默默忍受。我多啲了解佢，反而屋企不了解佢的心情。佢想離開娘家，想結婚，我都祈禱交託，睇下上帝畀唔畀。點知，出人意表! 教會重建2012年先落成，我哋 2013年結婚時，剛好教會出咗通告，可以行禮! 婚禮全靠弟兄姊妹的幫手。我最欣賞老婆詠雪會安排流程，結婚過程一齊參與，一齊影婚紗相都好開心。總之，比我哋預期ok，順利完成。婚後，好多嘢需要學習，互相扶持，互相體諒。最緊要我地身同感受，有傾有講，呢段婚姻是漫長的。
■繼續爭取：自力更生，不靠綜援!
我地一家三口，係工廠辛勤工作，互相照顧。希望盲人輔導會管理層，不要上有政策，下有對策，呢個社會要以民為本。而家重建，要將我們暫時搬遷去好遠。我們不想入屯門工作，因時間車程路程太遠。我哋期望在市區，或者南昌街總部安置一些失明人士。因為我哋實在極不方便。石硤尾總會可以自行出入，較熟悉。希望政府都要有責任，搵一個地方，畀盲人工廠及工友的生存機會。我地自力更生，不需靠綜援度日，因綜援都是納稅人的金錢。最後，希望社會人士多關注呢間香港唯一，以及亞洲唯一一間盲人工廠，我地超過56年，見証香港歷史。
